Federata Shqiptare e Futbollit mori pjesë në Panairin e Punës 2024”, që u zhvillua ditën e sotme  në ambientet e Fakultetit të Historisë & Gjeografisë dhe Fakultetit të Gjuhëve të Huaja.

Në kuadër të programit të “Internship-it” dhe mbështetjes së të rinjve, të cilët dëshirojnë të punojnë në fushën e futbollit, përfaqësues të FSHF-së njohën të gjithë studentët e interesuar me praktikat që ofron institucioni i futbollit, si edhe Departamentet e ndryshme të FSHF-së ku mund të bëhen pjesë, nga Departamenti i Marrëdhënieve me Publikun te Departamenti i Marketingut, Departamenti i Burimeve Njerëzore, Departamenti i Marrëdhënieve Institucionale dhe Projekteve etj..

Në të njëjtën kohë, prania e FSHF-së në këtë panair pune shërben edhe për të krijuar një marrëdhënie konkrete komunikimi mes vendit të punës dhe personave të interesuar për të punuar në futboll.

Falë programit të internship-it, shumë të rinj e kanë nisur karrierën e tyre në FSHF dhe janë të punësuar me kohë të plotë në institucionin e vetëm të futbollit shqiptar.

Shqipëria U-17 triumfoi me përmbysje në ndeshjen miqësore ndaj Sllovenisë U-17 në Ajdovščina Slloveni, sfidë që përfundoi 2-1 për kuqezinjtë.

Protagonisti kryesor ishte sulmuesi Gabriel Kulla, i cili shënoi dy gola me fanellën kuqezi në sfidën ndaj Sllovenisë U-17. Kjo ishte edhe ndeshja e parë me ekipin Kombëtar U-17 për trajnerin Bledi Shkëmbi që debuton kështu me fitore.

Tekniku kuqezi e nisi me këtë formacion titullar takimin ndaj Sllovenisë U-17: Daniel Culi (GK), Lukas Cekrezi, Kris Gecaj (C), Agon Bajrami, Milan Kovaçi, Rikardo Sheji, Arian Gavelli Sanchez, Ardit Muldakaj, Leon Myrtaj, Jordan Luan Kinnavong, Gabriel Kulla.

Ndeshja nisi e barabartë, teksa të dyja skuadrat u treguan të kujdesshme në prapavijë për të shmangur çdo rrezik. Megjithatë pas disa minutave, Sllovenia gjeti golin në të 21-të me Videnović Denis.

Shqipëria u mundua të reagonte dhe ja doli mbanë të barazonte rezultatin në minutën e 41-të me Gabriel Kullën. Sulmuesi pasi avancoi drejt zonës kundërshtare u pengua nga mbrojtësi i Sllovenisë dhe arbitri kyresor akordoi penallti. Nga pikë e bardhë e 11-metrave Gabriel Kulla goditi saktë dhe barazoi rezultatin. Kaq mjaftoi për pjesën e parë që përfundoi 1-1.

Në fraksionin e dytë, Shqipëria ishte më kërkuese në lojë dhe ja doli mbanë të merrte avantazhin në minutën e 72-të. Sërish Gabriel Kulla me një lëvizje të bukur shmangu mbrojtësin kundërshtar dhe goditi saktë duke realizuar golin e dytë për Shqipërinë.

Deri në fundin e takimit trajneri Bledi Shkëmbi kreu disa zëvendësime duke aktivizuar në fushën e lojës Darli Kurtin, Ernesto Marqeshin, Flavio Shkëmbin, Serxho Voglin, Matia Koçin, dhe Emiljano Mihanën.

Në fund asgjë nuk ndryshoi në rezultat dhe Shqipëria triumfoi në Ajdovščina Slloveni me rezultatin 2-1.

Java e 32-të e kampionatit “Abissnet Superiore” do të luhet të premten dhe të shtunën. Dy takimet e para do të zhvillohen në orën 15:00. Në stadiumin “Elbasan Arena”, Erzeni do të përballet me Tiranën, një ndeshje shumë e rëndësishme për objektivat e të dyja skuadrave. Në të njëjtën orë do të luhet edhe Kukësi – Skënderbeu, në stadiumin “Kukës Arena”.

Tre ndeshjet e tjera të javës së 32-të do të zhvillohen të shtunën. Takimi i parë i ditës do të jetë, Laçi – Egnatia që do të luhet në stadiumin e Laçit, në orën 15:00. Bardhezinjtë do të kërkojnë triumfin e radhës, ndërsa rrogozhinasit janë vetëm një fitore larg për të siguruar matematikisht pjesëmarrjen në “Final Four”.

Në orën 18:00 do të luhen edhe dy takimet e fundit të javës së 32-të. Në stadiumin “Niko Dovana” Teuta do të presë Vllazninë, ndërsa në “Arenën e Demave” Partizani do të përballet me Dinamo City.

Të gjitha ndeshjet e kampionatit “Abissnet Superiore” do të transmetohen live në kanalet MCN TV dhe MCN 24.

Federata Shqiptare e Futbollit organizoi ditën e sotme workshop-in me temë “Anti-racizmi,Barazia dhe Përfshirja në kontekstin e Inteligjencës Emocionale ne futboll”. Në këtë workshop, që u zhvillua në stadiumin “Air Albania” morën pjesë përfaqësues të klubeve të kampionatit “Abissnet Superiore”, përfaqësues nga çdo akademi futbolli në Tiranë, studentë të diplomuar në kurset që FSHF zhvillon, përfaqësues nga stafet e ekipeve Kombëtare, vajza dhe djem, si edhe përfaqësues nga secili klub i “Abissnet Superiore” për vajza.

Workshop-i kishte si synim rritjen e ndërgjegjësimit për anti-racizmin, barazinë dhe përfshirjen në futboll, si dhe prezantimin e qasjes së Inteligjencës Emocionale në kontekstin futbollistik, teksa u prezantuan edhe disa tema konkrete që lidhen me ndërtimin e aftësive praktike për përfshirjen në futboll, duke theksuar iniciativat dhe strategjitë kundër racizmit për krijimin e një mjedisi gjithëpërfshirës.

Pjesëmarrësit u nxitën me anë të diskutimeve, ushtrimeve dhe lojërave të ndryshme që zhvillojnë aftësitë e tyre për të rritur përfshirjen si në fushë ashtu dhe jashtë saj, duke i fuqizuar ata për të mbajtur qëndrime kundër racizmit, për të promovuar përfshirjen, diversitetin si dhe për të qenë më empatike dhe inteligjentë në kontekstin sportiv.

Ky nuk është workshop-i i parë që FSHF organizon pasi edhe në fundin e muajit shkurt të këtij vitit në “Shtëpinë e Futbollit” u zhvillua një workshop me temë “Diversiteti, Barazia dhe Përfshirja në Futboll” ku pjesëmarrës ishin përfaqësuesit e klubeve të “Abissnet Superiore”, drejtorë, trajnerë, futbollistë dhe futbolliste.

Risia e këtij seminari ishte prezantimi i konceptit të Inteligjences Emocionale në futboll si dhe njohja dhe rëndësia e emocioneve në jetën tonë private dhe profesionale. Lidhja direkte e zgjuarsisë Emocionale me 4 faktorët e suksesit: Efektivitetin, Marrëdhënie të suksesshme, Mirëqenie dhe Cilësine e jetës.

Shqipëria U-17 zhvilloi paraditen e sotme në Udine të Italisë seancën e fundit stërvitore, në kuadër të ndeshjes miqësore ndaj Sllovenisë U-17.

Departamenti i Komunikimit në FSHF bën me dije se grupi është në gjendje të mirë dhe të gjithë lojtarët janë të gatshëm për të dhënë kontributin e tyre në sfidën miqësore ndaj Sllovenisë U-17

Nën drejtimin e trajnerit Bledi Shkëmbi skuadra u stërvit për rreth një orë, teksa seanca e fundit nuk ka pasur shumë ngarkesa fizike, me stafin teknik që e fokusoi më shumë stërvitjen në ushtrimet me topin dhe situata të ndryshme loje.

Takimi miqësor i Shqipërisë U-17 ndaj Sllovenisë U-17 do të luhet nesër më datë 18 prill, në ora 11:00, në Ajdovščina Slloveni.

Presidenti i FSHF-së, Armand Duka, mori pjesë në ceremoninë e prezantimit të projektit të kampusit të Akademisë së Futbollit Manchester City si edhe në ekspozimin e trofeve të Manchester City “Treble Trophy Tour” në Qendrën për Hapje dhe Dialog (COD) në Kryeministri.

Një event i organizuar nga “Dyrrah City Football Academy” në bashkëpunim me Manchester City FC, por edhe me mbështetjen e FSHF-së, që do të ndërtojnë në qytetin e Durrësit një nga kampuset sportive më të mira në Shqipëri, por që gjithashtu kanë sjellë në vendin tonë edhe trofetë e fituara në sezonin e kaluar nga klubi anglez, si Premier League, Champions League, FA Cup, UEFA Super Cup dhe FIFA Club World Cup.

Gjatë fjalës përshëndetëse në këtë event, Presidenti Duka tha se suksesi i Manchester City-t është dëshmi e një pune shumëvjeçare. Kreu i qeverisë shqiptare të futbollit falënderoi të gjithë bashkëpunëtorët që do të bëjnë të mundur realizimin e projektit të kampusit të Akademisë së Futbollit të Manchester City-t në Durrës dhe shtoi se zhvillimi i futbollit të fëmijëve është një prioritet i FSHF-së. Gjithashtu, Presidenti Duka bëri thirrje edhe njëherë për ligjin e sponsorizimit, që ende nuk është aplikuar në vendin tonë.

Më poshtë fjala e plotë e Presidentit të FSHF-së, Armand Duka, në ceremoninë e prezantimit të projektit të kampusit të Akademisë së Futbollit Manchester City:  

“Manchester City në Tiranë ka sjellë pesë kupa dhe është një lajm i bukur. Kupat unë i shoh si dëshmi të një projekti, të një pune shumëvjeçare të një prej klubeve më të mëdha në botë. Në prag të finales së Champions League vitin e kaluar në Stamboll, CEO i Manchester City tha se në futboll rëndom thuhet që duhet të kesh talent, fat dhe duhet të punosh. Rasti i Manchester City-t është punë, punë dhe vetëm punë.

Pjesë e këtij projekti tentojmë të bëhemi edhe ne, për të mësuar nga ato se çfarë ka bërë Manchester City, për t’i implementuar në Tiranë, nëpërmjet trajnimeve dhe duke shfrytëzuar eksperiencën që Manchester City ka. Gjithashtu nëpërmjet projektit të shkëlqyer që do të vazhdojë arkitekti i talentuar, Marco Casamonti. Kryeministri i vendit, të cilin dua ta falënderoj për mbështetjen e këtij projekti, më ka thënë që është një nga projektet më të mira të sportit. Në fakt mbahet si akademi nga më të mirat sot, të paktën nga pikëpamja arkitektonike ajo e ndërtuar së fundmi në Firence por Kryeministri më ka thënë që kjo do të jetë më e bukur dhe unë uroj që të jetë më e bukur. Kam shumë besim te Marco që do të bëjë një vepër arti. Edhe njëherë dua të falënderoj Krymenistrin për iniciativën dhe mbështetjen e këtij projekti, dhe Kryetaren e Bashkisë të qytetit tim, Emirjana Sako. Jam shumë i sigurt që ky do të jetë një projekt i suksesshëm jo vetëm për Durrësin por për të gjithë Shqipërinë.

FSHF e ka në prioritetet e saj mbështetjen e futbollit të fëmijëve dhe bën gjithçka për ta bërë atë sa më atraktiv, më të suksesshëm dhe e mbështet atë me bazë materiale, invenstime dhe me gjithçka mundet, mbase më mirë se çdo Federatë tjetër në Europë. Jam i bindur që futbolli ka nevojë për projekte dhe strategji të përbashkëta ku të përfshihemi të gjithë si në këtë rast, ku të përfshihet edhe bota e biznesit, për ta bërë këtë lojë të dashur për të gjithë akoma edhe më të suksesshëm. Ne kemi vërtetë shumë detyrime për fëmijët tanë dhe një nga ato është edhe sporti. Ne i dimë benefitet që ka sporti: shëndetësore, edukative por edhe ekonomike. Futbolli sot e ka jetike ligjin e sponsorizimit, në fakt tashmë të premtuar nga Kryeministri dhe unë jam i sigurt që ky ligj nuk do të jetë një kosto për buxhetin e shtetit, por është një investim që ka rikthim të sigurt në një afat pesë vjeçar.

Unë shpreh mbështetjen e plotë të FSHF-së jo vetëm për këtë akademi, padyshim për këtë që do të jetë një shkollë për të gjitha akademitë e tjera, por për çdo akademi, për çdo ekip fëmijësh që krijohet në Shqipëri. Në fund dua të falënderoj edhe drejtuesit e Manchester City që janë këtu dhe dua t’ju them që ne e kemi Manchester City-n në FSHF dhe ai është Pablo Zabaleta, ndërsa tani do ta kemi edhe si akademi. Faleminderit dhe uroj një projekt sa më të mbarë, jam i sigurt që do të jetë një projekt i suksesshëm sepse Manchester City nuk ka dështuar asnjëherë, por edhe ne në përgjithësi nuk kemi dështuar. Kështu që dy elementë që nuk dështojnë kanë një sukses të sigurt. Faleminderit!” – tha Presidenti i FSHF-së, Armand Duka.

FSHF në muajin shkurt të këtij viti mirëpriti në ambientet e “Shtëpisë së Futbollit” trajnerët e akademive të futbollit të zonës së Tiranës dhe Durrësit në një seminar të organizuar nga Dyrrah City Football Academy” në bashkëpunim me Manchester City FC si edhe me mbështetjen e FSHF-së, ku pjesëmarrës si lektorë ishin dy trajnerët e ardhur nga akademia e Manchester City, Gavin Rhodes dhe Andy Smith. Ndërsa sot dhe nesër do të zhvillohen edhe disa aktivitete të tjera si në “Shtëpinë e Futbollit” po ashtu edhe në stadiumin “Air Albania”, ku përfaqësueset e Kombëtareve rajonale të Tiranës dhe Durrësit të grupmoshës U-13 dhe U-14 do të stërviten dhe do të luajnë së bashku me trajnerët e akademisë së Manchester City-t.

Formula “Final 4”, risia e FSHF-së në këtë edicion futbollistik nuk do të aplikohet vetëm në kampionatin “Abissnet Superiore” për djem, por edhe në kampionatin e vajzave. Kur kanë mbetur edhe dy javë nga epilogu i këtij sezoni futbollistik në kampionatin e vajzave, katër skuadrat që do të jenë pjesë e “Final 4” janë shpallur tashmë, falë renditjes.

Vllaznia, Apolonia, Partizani e Tirana janë katër ekipet që do të luajnë në “Final 4”, nga ku do të shpallet edhe skuadra kampione e sezonit futbollistik 2023-2024.

Por si do të funksionojë skema?

Pasi të përfundojnë edhe ndeshjet e mbetura të këtij edicioni, skuadrat e renditura nё vendin e  parё, dytё, tretë dhe të  katërt, do të zhvillojnë ndeshje play off sipas shortit më poshtë, që do të hidhet pas përfundimit të fazës së dytë:

Në vazon e parë do të jenë ekipet e renditura në vendin e 1-rë dhe të 2-të ;
Në vazon e dytë do të jenë ekipet e renditura në vendin e 3-të dhe të 4-të.

Ndeshjet do të zhvillohen me takime vajtje-ardhje, teksa sfidat e para do të zhvillohen në fushën e ekipeve të renditura më poshtë në renditje. Në rast barazimi tё pikёve pas dy takimeve tё lojës sё rregullt, skuadra e renditur mё mirё nё klasifikim kualifikohet pёr nё ndeshjen finale.

Finalja e madhe që do të përcaktojë edhe kampionen e këtij edicioni do të luhet më 11 maj në “Shtëpinë e Futbollit”. Sakaq, dy ekipet që nuk kalojnë në finale do të zhvillojnë një ndeshje me një takim, për të përcaktuar vendin e tretë dhe të katërt, me ndeshjen që do të luhet po në “Shtëpinë e Futbollit”.

Ekipi kampion i “Abissnet Superiore” për vajza do të përfaqësojë Shqipërinë në raundin para-eliminator në UEFA Champions League.

Eleven UEFA national associations from Southeast Europe convened today at the headquarters of the Albanian Football Association in Tirana for the UEFA Strategic National Associations meeting.

Hosted by Albanian FA President and UEFA Vice-President, Mr. Armand Duka, the gathering focused on critical aspects of UEFA’s football development strategy, such as: the future format of UEFA club competitions post-2024 and the accompanying new solidarity program, discussions on refereeing matters and upcoming developments, benchmarking data and analysis in sporting areas and finances, and exploration of betting systems and emerging opportunities for the participating countries.

Representatives from 11 football national associations were invited, including Bosnia-Herzegovina, Croatia, Cyprus, Greece, Kosovo, Montenegro, North Macedonia, Serbia, Slovenia, Turkey, and Albania.

After presentations on these topics, the participating national associations delved into discussions regarding the future of European football, upon which all participants unanimously expressed unwavering support for President Ćeferin and the UEFA administration.

Njëmbëdhjetë federata anëtare të UEFA-s nga Europa Juglindore u mblodhën sot në Tiranë, në selinë qëndrore të Federatës Shqiptare të Futbollit, për Mbledhjen strategjike të Federatave anëtare të UEFA-s.

E mikpritur nga Presidenti i FSHF-së dhe zëvendëspresidenti i UEFA-s, z. Armand Duka, mbledhja u fokusua në aspekte kritike të strategjisë së UEFA-s për zhvillimin e futbollit si: formati i ardhshëm i garave të klubeve të UEFA-s pas vitit 2024 dhe programi i ri shoqërues i solidaritetit, diskutimet mbi çështjet e arbitrazhit dhe zhvillimet e ardhshme, krahasimi i të dhënave e analizat në fushën sportive dhe financat dhe eksplorimi i sistemeve të basteve dhe mundësive në zhvillim për vendet pjesëmarrëse.

Pjesëmarrës në këtë mbledhje ishin përfaqësues nga 11 federata kombëtare të futbollit, duke përfshirë Bosnje-Hercegovinën, Kroacinë, Qipron, Greqinë, Kosovën, Malin e Zi, Maqedoninë e Veriut, Serbinë, Slloveninë, Turqinë dhe Shqipërinë.

Pas prezantimeve të këtyre temave, federatat pjesëmarrëse u thelluan në diskutime në lidhje me të ardhmen e futbollit europian, ku të gjithë pjesëmarrësit shprehën njëzëri mbështetjen e palëkundur për Presidentin Ćeferin dhe administratën e UEFA-s.