Është mbyllur java e 15-të dhe e fundit e kampionatit të rregullt në FSHF Sunday League, duke përcaktuar skuadrat që do të vijojnë garën në tre fronte: për titullin kampion, për Kupën Oktapus dhe për Kupën e Mirënjohjes.

Pas përfundimit të fazës së rregullt, tashmë janë zbardhur përballjet direkte që do të vendosin fatin e çdo ekipi deri në finalet e mëdha.

Për titullin kampion do të përballen:

BARRIKADA – JATA MARKET

VILA L – DYMBEDHJETA

FC TIGRES – PRIMO

DOMJA – 3 LIONS

DAJTI – ANTIGONEA

LUMINESEN – STORM

ATS – IMMI

ALPHA CROSSFIT – M&D

Këto skuadra do të luftojnë për Kupën e Kampionit, në ndeshje direkte eliminatore deri në përcaktimin e finalistëve.

Për Kupën Oktapus shorti ka rezervuar këto përballje:

FRIENDS TEAM – ELSO

CONFUCIUS – COCA COLA

LEGJENDAT – TIRANA E RE

ALBAMER – MALLAKASTRA

Ndërsa për Kupën e Mirënjohjes do të përballen:

IMPLANT SWISS – VIBES

MESSER – JU AR PLAST

RAIFFEISEN – HAPPY DENT

FB PASSION – FUTURA DENT

Të gjitha ndeshjet do të zhvillohen me sistem përballjeje direkte, ku çdo sfidë do të jetë vendimtare deri në përcaktimin e finaleve në të tre kompeticionet.

Me mbylljen e kampionatit të rregullt, FSHF Sunday League hyn në fazën më emocionuese të sezonit, aty ku çdo detaj dhe çdo rezultat do të ketë peshë vendimtare në rrugën drejt trofeve.

Në ambientet e Federatës Shqiptare të Futbollit u zhvillua aktiviteti i organizuar në bashkëpunim me Postën Shqiptare për promovimin zyrtar të pullave postare “Shqipëria në Euro” dhe “Kampionati Europian i Futbollit”, një iniciativë që synon të vërë në pah vlerat e pullës postare shqiptare dhe simbolikën që ajo përfaqëson.

Në këtë aktivitet morën pjesë Sekretari i Përgjithshëm i FSHF, Ilir Shulku, Shefi i Kabinetit të Postës, Artemon Cukalla, Elion Semanaj nga Departamenti i Administrimit të Postës, Drejtoresha e Marketingut të Postës, Albiona Sulo, si dhe përfaqësues të filatelisë, të Komisionit të Pullës dhe përfaqësues të FSHF.

Ceremonia u shënua nga firmosja simbolike e një “Cartmaximum” (kartolinë), ku një fëmijë shkroi një mesazh dedikuar futbollistit të Kombëtares, Nedim Bajrami, si shenjë frymëzimi dhe krenarie për përfaqësimin e Shqipërisë në arenën europiane.

Gjatë fjalës së tij në këtë event, Sekretari i Përgjithshëm i FSHF-së, Ilir Shulku, vlerësoi bashkëpunimin me Postën Shqiptare:

“Jam i lumtur që në ambientet e Federatës Shqiptare të Futbollit, promovojmë një iniciativë që bashkon sportin me kulturën dhe identitetin tonë kombëtar.

Pullat postare janë më shumë se mjete komunikimi; ato janë simbole përfaqësimi dhe ambasadorë të një kombi. Përmes pullave “Shqipëria në Euro” dhe “Kampionati Europian i Futbollit”, po vulosim simbolikisht një nga momentet më të rëndësishme të historisë sonë sportive. Pjesëmarrja në finalet e një Kampionati Europian ishte një arritje që bashkoi shqiptarët kudo që ndodhen dhe që sot bëhet pjesë e kujtesës sonë kulturore përmes filatelisë.

Bashkëpunimi me Postën Shqiptare dëshmon se institucionet tona mund të punojnë së bashku për të promovuar vlerat më të mira të vendit. Sporti dhe diplomacia kulturore ndërthuren natyrshëm, sepse përfaqësojnë identitetin dhe aspiratën tonë për t’u prezantuar me dinjitet në Europë.

Falënderoj Postën Shqiptare për këtë bashkëpunim dhe ju ftoj të vizitoni ekspozitën”, – tha Shulku.

Ndërsa përfaqësuesi i Postës Shqiptare, Elion Semanaj, u shpreh: “Posta Shqiptare është krenare të jetë pjesë e kësaj nisme që promovon një moment të rëndësishëm të sportit shqiptar. Përmes këtyre pullave postare, ne synojmë të përcjellim vlerat, historinë dhe krenarinë që përfaqëson futbolli për vendin tonë, duke forcuar lidhjen mes sportit dhe identitetit kombëtar”.

Në kuadër të këtij bashkëpunimi është hapur edhe mini-ekspozita filatelike, e cila do të qëndrojë e hapur nga data 26 shkurt 2026 deri më 3 mars 2026. Ekspozita përfshin seksionin historik me pulla shqiptare me tematikë sportive ndër vite, seksionin e boceteve të reja dhe historike, panelin special “Kuq e Zi – Simboli që udhëton në Europë”, si dhe stenda të filatelistëve me koleksione sportive me dimension edukativ.

Ky aktivitet theksoi rolin e pullës postare si simbol i përfaqësimit kombëtar në Europë, ndërthurjen e sportit me diplomacinë kulturore dhe institucionale, si dhe rëndësinë e bashkëpunimit ndërinstitucional mes Postës Shqiptare dhe Federatës Shqiptare të Futbollit.

Në Gjirokastër po merr formë një tjetër investim i rëndësishëm në infrastrukturën sportive, me ndërtimin e dy fushave me përmasa standarde, që pritet t’i japin një zhvillim të ri futbollit në këtë qytet.

FSHF në bashkëpunim me Bashkinë e Gjirokastrës po punon intensivisht për finalizimin e projektit, që tashmë ka hyrë në fazën përmbyllëse. Aktualisht ka nisur procesi i shtrimit të tapetit artificial, një hap i rëndësishëm drejt përfundimit të plotë të investimit.

Njëra prej fushave ka qenë ekzistuese dhe i është nënshtruar rikonstruksionit të plotë, ndërsa fusha e dytë është një investim i ri i FSHF-së në kuadër të projektit “100 fushat”, që synon përmirësimin dhe zgjerimin e infrastrukturës sportive në të gjithë vendin.

Ky investim do t’i shërbejë drejtpërdrejt komunitetit sportiv, të rinjve dhe akademive lokale, duke krijuar kushte moderne për stërvitje dhe zhvillim.

Kombëtarja e vajzave vijon intensivisht përgatitjet në Shkodër në kuadër të sfidave kualifikuese ndaj Malit të Zi (3 mars, ora 14:00, Nikshiq) dhe Çekisë (7 mars, ora 18:00, “Loro Boriçi”), të vlefshme për Botërorin 2027.

Nën drejtimin e trajnerit Grima, skuadra ka zhvilluar disa seanca stërvitore me intensitet të lartë, duke u fokusuar si në aspektin taktik ashtu edhe në atë fizik.

Në një prononcim për fshf.org, dy futbollistet Arbiona Bajraktari dhe Alma Hilaj kanë treguar më shumë rreth situatës në kampin kuqezi.

Mbrojtësja Bajraktari nënvizon se skuadra është e fokusuar fillimisht te ndeshja e parë kundër Malit të Zi për të marrë tre pikët e para dhe thekson se përgatitja nga ana e skuadrës po zhvillohet në nivele maksimale.

Atmosfera në skuadër – Atmosfera është shumë e mirë. Vajzat janë të përgatitura maksimalisht. Do mundohemi që të japim maksimumin në këto ndeshje, pasi janë shumë të rëndësishme për ne.

Objektivi për dy ndeshjet e para kualifikuese – Duhet të jemi me këmbë në tokë. Duhet t’i marrim ndeshjet 1 e nga 1. Së pari kemi ndeshjen me Malin e Zi dhe do të mundohemi që të marrim 3 pikë. Pastaj kemi ndeshjen me Çekinë, me të cilën kemi pasur dy përballje në Nations League. Është një kundërshtar i fortë, por do mundohemi që të japim maksimumin.

Analiza e kundërshtarit – Është analizuar si nga stafi, edhe prej nesh. Duke marrë parasysh që jemi ndeshur me disa skuadra, Uellsi është një kundërshtar më i fortë.

Si ndikon afrimi i lojtareve të reja në skuadër? – Loja e ekipit kombëtar po vjen gradualisht duke u rritur, po vjen duke u përmirësuar. Shpresoj që afrimet në skuadër të na ndihmojnë sa më mirë që të fitojmë ndeshjet.

Edhe Alma Hilaj theksoi atmosferën pozitive në skuadër dhe vendosmërinë për të dhënë maksimumin në çdo përballje.

Situata e skuadrës – Atmosfera është shumë e mirë. Është dita e katërt sot dhe po përgatitemi më së miri për të përballuar dy ndeshjet e para që kemi për këto kualifikuese.

Me çfarë objektivi hyn skuadra në këto kualifikuese? – Objektivi është për të marrë më të mirën. Kemi tre skuadra që janë të forta. Ne duam që përballë çdo skuadre të japim më të mirën. Futbolli është futboll. Kemi pasur ndeshje ku kemi dhënë maksimumin dhe ndoshta s’kemi marrë rezultat. Ideja është që të bëjmë performancë të mirë dhe të shpresojmë të marrim rezultatin. Objektivi është të qëndrojmë në Ligën B. E kemi arritur vjet dhe shpresoj të vazhdojmë ta bëjmë.

Rikthimet dhe afrimet e reja në skuadër – Ardhjet e reja kanë bërë gjithmonë mirë. Po ashtu edhe rikthimet janë një ndihmë e madhe për grupin dhe lojën. Shpresoj që të ndihen sa më mirë dhe të japin maksimumin.

Në prag të këtyre sfidave të rëndësishme, Kombëtarja synon të nisë me rezultate pozitive rrugëtimin drejt objektivave të saj në kualifikueset e Botërorit 2027.

Java e 24-të e Kategorisë së Parë do të luhet e ndarë në dy ditë, të shtunën dhe të dielën. Të gjitha ndeshjet janë programuar në orën 13:30.

Më 28 shkurt, Korabi do të përballet me Kastriotin, ndërsa Pogradeci do të udhëtojë në transfertën e vështirë ndaj Apolonisë. Laçi do të luajë gjithashtu në transfertë përballë Lushnjes.

Tre ndeshjet e tjera do të zhvillohen më 1 mars. Kukësi do të përballet me Ilirinë, ndërsa Besa pret Burrelin.

Kryesuesit e kampionatit, Skënderbeu, do të luajnë në transfertë në Gjirokastër ndaj AF Luftëtarit.

Java 24

Korabi – Kastrioti, 28.02.2026, 13:30

Apolonia – Pogradeci, 28.02.2026, 13:30

Lushnja – KF Laçi, 28.02.2026, 13:30

Iliria – Kukësi, 01.03.2026, ora 13:30

Besa – Burreli, 01.03.2026, 13:30

AF Luftëtari – Skënderbeu, 01.03.2026, 13:30

Kombëtarja e vajzave zhvilloi sot seancën e radhës stërvitore në kuadër të përgatitjeve për sfidat e para të kualifikueseve të vlefshme për Botërorin 2027.

I gjithë grupi ishte i plotë në këtë seancë stërvitore, që nisi me një fazë nxehjeje, për të vijuar me ushtrime dinamike dhe argëtuese që ndihmojnë në rritjen e harmonisë brenda grupit.

Në pjesën përmbyllëse, stafi teknik vendosi theksin te loja me fokus taktik, ku vajzat punuan mbi skema dhe situata konkrete të lojës.

Skuadra vijon përgatitjet me intensitet dhe përqendrim të lartë, duke synuar të jetë në formën më të mirë për ndeshjen e parë ndaj Malit të Zi që luhet më 3 mars në ora 14:00 në Nikshiq.

Më 7 mars, skuadra kuqezi do të përballet me Çekinë në “Loro Boriçi” duke nisur nga ora 18:00.

Federata e Futbollit, në bashkëpunim me UEFA-n, përmbylli me sukses Workshopin Rajonal të Licensimit të Klubeve, një aktivitet dyditor që u zhvillua në Tiranë dhe që kishte për qëllim zhvillimin dhe profesionalizimin e futbollit europian.

Në këtë workshop morën pjesë përfaqësues nga 19 federata anëtare të UEFA-s, të cilët u trajnuan nga ekspertët më të lartë të UEFA-s mbi standardet, kriteret dhe proceset e licensimit të klubeve, me fokus harmonizimin e praktikave dhe rritjen e cilësisë së menaxhimit në nivel kombëtar dhe ndërkombëtar.

Drejtori Administrativ i FSHF-së, Aldi Topçiu,në një prononcim për fshf.org, vlerësoi rëndësinë e workshopit, bashkëpunimin e shkëlqyer me UEFA-n dhe federatat anëtare, si dhe mundësinë për të shkëmbyer ide dhe përvoja mbi procesin e licensimit për zhvillimin profesional të klubeve.

“Përfunduam workshopin rajonal të licensimit. Ishte një event për t’u vlerësuar. Falënderojmë UEFA-n për vlerësimin e dhënë në organizimin e këtij eventi. Morën pjesë 19 federata nga vende të ndryshme të Europës. Patëm mundësi të shkëmbenim mendime dhe ide për zhvillimet më të fundit lidhur me procesin e licensimit të klubeve dhe vendimet më të fundit të trupave vendimmarrëse të UEFA-s dhe gjykatave ndërkombëtare lidhur me këtë çështje.

Bashkëpunimi vazhdon të jetë i shkëlqyer. Ajo që unë do të evidentoja nga ky event është ndjenja mjaft pozitive e të gjithë federatave pjesëmarrëse, shumë prej të cilave vinin për herë të parë në Shqipëri dhe patën mundësi të prezantohen me realitetin e futbollit shqiptar. Këto janë evente të mira edhe për krahasimin midis federatave.

Aspekti interesant i këtyre eventeve është gjithmonë mundësia për të shkëmbyer ide dhe mendime mes federatave. Këto evente janë interesante edhe për federatat vizituese, që disa prej tyre vinin për herë të parë në Shqipëri dhe patën mundësi të njihen me realitetin e zhvillimit të futbollit shqiptar, si duke parë stadiumin “Air Albania”, ambientet e “Shtëpisë së Futbollit”. Patëm mundësi të shpalosim të gjitha zhvillimet e fundit dhe të dhënat e fundit të federatës tonë përsa i përket licensimeve të klubeve.

Ky workshop vjen edhe në një moment mjaft aktual. Ne jemi në mes të procesit të licensimit, kështu që shpresojmë që do të na ndihmojë për të pasur një proces sa më të shëndetshëm, sa më të mirë, sa më të suksesshëm dhe dëshirojmë që ky proces të mos jetë vetëm një formalitet për klubet tona, por të kthehet në një udhërrëfyes solid për zhvillimin e tyre”, – tha Drejtori Administrativ i FSHF-së, Aldi Topçiu.

Kombëtarja U-17 për vajza zhvilloi pasditen e sotme ndeshjen e parë të vlefshme për raundin e dytë të Kampionatit Europian 2026 për këtë grupmoshë, kundër Andorrës.

Takimi i luajtur në “Shtëpinë e Futbollit” u mbyll me fitoren 0-4 të skuadrës mike, të cilat shënuan tre gola në pjesën e parë dhe një gol në fraksionin e dytë.  Në minutën e 38-të skuadra kuqezi mbeti me 10 lojtare pas daljes me karton të kuq të Marina Rushaj.

Trajnerja Cyme Lulaj hodhi në fushë këtë formacion: Ambra Reshiti (GK), Kristel Tuku, Reiana Jahelezi, Marina Rushaj (C), Besiana Gola, Audrina Lajthiza, Albana Malaj, Andrea Klleci, Emi Maksuti, Tuhana Cifliku dhe Kejsi Demiraj.

Pavarësisht rezultatit, vajzat e drejtuara nga trajnerja Lulaj dhanë maksimumin deri në fund të sfidës.

Shqipëria do të luajë ndeshjen e dytë më 4 mars, në orën 14:00, sërish në “Shtëpinë e Futbollit”, përballë Izraelit. Ndërkohë, më 1 mars do të zhvillohet sfida mes Izraelit dhe Andorrës, po në të njëjtin vend.

Komiteti Ekzekutiv i Federatës së Futbollit zhvilloi sot mbledhjen e parë pas Asamblesë së Përgjithshme të Zakonshme Zgjedhore. Nën drejtimin e Presidentit Armand Duka, Komiteti zgjodhi Zëvendës Presidentë për katërvjeçarin e ardhshëm, Lufti Nuriun dhe Geri Çipin.

Gjithashtu, FSHF do të prezantojë së shpejti fanellat e reja të Kombëtares A. Kuqezinjtë do të zbresin në fushë me fanellat e reja në ndeshjen historike të Play-Off-it ndaj Polonisë.

Komiteti Ekzekutiv miratoi realizimin e një fushate promovuese që do të shoqërojë këtë moment me rëndësi sportive dhe emocionuese. Aktiviteti parashikon realizimin e një spoti televiziv, i shoqëruar me promovim në rrjetet sociale dhe kanale të tjera, me qëllim rritjen e ekspozimit të Kombëtares dhe përforcimin e lidhjes me tifozët.

Po ashtu, Komiteti Ekzekutiv miratoi organizimin e një Fan Zone në ambientet e Shtëpisë së Futbollit, në kuadër të ndeshjes Play-Off për Kupën e Botës mes Polonisë dhe Shqipërisë më 26 mars 2026. Fan Zone do të ofrojë transmetim live të ndeshjes, muzikë live me këngëtar dhe DJ, aktivizime promocionale, pije për tifozët, etj.

Aktiviteti do të realizohet në bashkëpunim me partnerët e FSHF-së, Vodafone, Credins Bank, Uji Tepelenë dhe Birra Vatan, me qëllim krijimin e një eksperience unike dhe përfshirjen e tifozëve. Të gjitha detajet e këtij organizimi do të bëhen të ditura në vijim.