Janë luajtur ndeshjet e javës së 6-të të Kategorisë së Parë.

Kukësi fitoi 2-0 ndaj Besës, ndërsa Flamurtari mori një fitore të thellë 4-1 në transfertë ndaj Orikut. Iliria siguroi tri pikët përballë Burrelit, duke triumfuar me rezultatin 1-0, ndërsa Korabi dhe Bylis u ndanë në barazim pa gola.

Fitore të rëndësishme mori edhe Besëlidhja, që mposhti Kastriotin me rezultatin 4-1. Ndërkohë, përballja mes Pogradecit dhe Sopotit përfundoi në barazim 2-2.

Pas gjashtë javësh kampionat, Pogradeci vijon të kryesojë renditjen me 12 pikë. Në ndjekje janë Besa dhe Bylis me nga 10 pikë, ndërsa Flamurtari, Iliria dhe Kukësi kanë grumbulluar nga 9 pikë.

Kampionati i Kategorisë së Parë vijon me rivalitet në krye të renditjes, ku diferencat mes skuadrave mbeten të ngushta pas javës së gjashtë.

Kombëtarja shqiptare U-15 ka mësuar kalendarin e ndeshjeve në edicionin e parë të FIFA U-15 World Cup & Festival 2026, që do të zhvillohet në Azerbajxhan. Kuqezinjtë do ta nisin aventurën ndërkombëtare më 24 tetor, ndërsa do të luajnë pesë takime në fazën e parë të turneut.

Shqipëria do ta nisë këtë eksperiencë me përballjen ndaj Ishujve Turks dhe Kaikos, më 24 tetor, në orën 12:45. Një ditë më pas, më 25 tetor, kuqezinjtë do të zbresin dy herë në fushë, fillimisht kundër Mauritanisë në orën 11:30 dhe më pas ndaj Ruandës, në orën 18:15.

Faza e parë do të përfundojë më 26 tetor me dy ndeshjet e fundit të Shqipërisë U-15. Kombëtarja shqiptare do të përballet me Vanuatun në orën 10:15, ndërsa në orën 17:00 do të luajë ndaj Bregut të Fildishtë.

Pjesëmarrja në këtë aktivitet të organizuar nga FIFA përfaqëson një mundësi të rëndësishme për futbollistët e rinj shqiptarë, të cilët do të kenë mundësinë të përballen me kundërshtarë nga kontinente të ndryshme dhe të fitojnë përvojë në arenën ndërkombëtare.

Kalendari i ndeshjeve të Shqipërisë U-15:

Shqipëri – Ishujt Turks dhe Kaikos, 24 tetor, ora 12:45

Shqipëri – Mauritani, 25 tetor, ora 11:30

Shqipëri – Ruandë, 25 tetor, ora 18:15

Vanuatu – Shqipëri, 26 tetor, ora 10:15

Bregu i Fildishtë – Shqipëri, 26 tetor, ora 17:00

Trajnerja e Kombëtares shqiptare U-15 për vajza, Rabije Tota, ka publikuar listën e futbollisteve të grumbulluara për turneun zhvillimor të UEFA-s, “UEFA Women’s Under-15 Development Tournament”, që do të zhvillohet në Tiranë nga data 20 deri më 25 tetor.

Turneu do të organizohet nga FSHF dhe do të zhvillohet në ambientet e “Shtëpisë së Futbollit”, me pjesëmarrjen e Shqipërisë, Letonisë, Rumanisë dhe Irlandës së Veriut.

Kombëtarja U-15 e vajzave do të luajë tri ndeshje në këtë aktivitet ndërkombëtar, duke nisur me përballjen ndaj Letonisë më 20 tetor, në orën 14:30. Më 22 tetor, Shqipëria do të përballet me Rumaninë, në të njëjtën orë, ndërsa ndeshjen e fundit do ta luajë më 25 tetor, ndaj Irlandës së Veriut, në orën 14:00.

Ky turne përbën një mundësi të rëndësishme për vajzat e Kombëtares U-15 për të fituar përvojë ndërkombëtare, për t’u përballur me ekipe të tjera europiane dhe për të vijuar procesin e zhvillimit në këtë grupmoshë.

Lista e Kombëtares u-15 për vajza:

Departamenti i Garave në FSHF ka organizuar hedhjen e shortit për kampionatin e Kategorisë së Tretë për sezonin 2026/2027, duke përcaktuar kalendarin e ndeshjeve për të dy grupet.

Në këtë edicion marrin pjesë 24 skuadra, të ndara në dy grupe, A dhe B, të cilat do të garojnë për objektivat e tyre gjatë sezonit të ri futbollistik.

Java e parë e kampionatit do të sjellë përballje interesante në të dy grupet.

Grupi A – Java e parë

Kukësi B – Mirdita

KF Shkodra – Miloti

Bulqiza – FK Shënkolli

Korabi B – North United FC

T-Kamza – Dinamo City B

KF Tirana B – KF Adriatiku 2012

Grupi B – Java e parë

KF Përmeti – Gramozi

KF Kinostudio – Egnatia B

KF Osumi – Tepelena

KF Sopoti B – Besa Elite

FK Skrapari – KS Shkumbini

KF Turbina – A.S. Lefter Millo

Kampionati i Kategorisë së Tretë për sezonin 2026/2027 do të nisë më 24 tetor 2026.

Më poshtë gjeni kalendarin e plotë të kampionatit për të dy grupet.

Kategoria e Tretë – Grupi A – Sezoni 2026-27

Kategoria e Tretë – Grupi B – Sezoni 2026-27

Projekti i Federatës së Futbollit për ndërtimin e dy fushave moderne në Luginën e Preshevës, një në Komunën e Preshevës dhe një në Komunën e Bujanocit, ka marrë mbështetjen e drejtuesve vendorë, trajnerëve dhe futbollistëve të rinj, të cilët e vlerësojnë këtë investim si një mundësi të rëndësishme për zhvillimin e futbollit të moshave.

Kryetarja e Komunës së Preshevës, Ardita Sinani, e cilësoi projektin si një investim që sjell shpresë për të ardhmen dhe falënderoi Presidentin e FSHF-së, Armand Duka, për mbështetjen e vazhdueshme.

“Ka investime që ndërtojnë infrastrukturë, por ka edhe investime që ndërtojnë shpresë për të ardhmen. I tillë është edhe projekti i FSHF-së për ndërtimin e dy fushave në Luginën e Preshevës. E para në Zhunicë, në Komunën e Preshevës, aty ku dikur ka qenë terreni i mirë i futbollit, dhe e dyta në Komunën e Bujanocit. E falënderoj përzemërsisht, veçanërisht, Presidentin e FSHF-së, z. Armand Duka, për përkushtimin dhe mbështetjen e vazhdueshme”, – tha Ardita Sinani.

Trajneri Besim Nasufi theksoi rëndësinë e zhvillimit të infrastrukture për klubet dhe shkollat e futbollit në Preshevë.

“Që në takimin e parë me Presidentin e FSHF-së, Armand Duka, pashë në sytë e tij një entuziazëm shumë të madh për ndërtimin e fushave dhe, sidomos, gjatë takimit me fëmijët, e pa nga afër se fusha ishte mungesë dhe na premtoi se do të ndërtojë një stadium në Luginën e Preshevës. Rëndësia e këtij stadiumi është sepse në Preshevë luajnë dy klube sportive dhe kemi katër shkolla të futbollit, ku me ndërtimin e këtij stadiumi do të kenë mundësi të gjithë fëmijët të stërviten dhe të luajnë në stadiumin e ri, që është investuar nga FSHF-ja”, – tha Besim Nasufi.

Edhe trajneri Driton Aliu vlerësoi ndikimin që do të ketë projekti në stërvitjen dhe zhvillimin e talenteve të reja.

“Unë si trajner, njëkohësisht edhe si punëtor i Qendrës Sportive Presheva, jam shumë krenar dhe i lumtur për këtë projekt të rëndësishëm, sidomos për nxënësit dhe rininë tonë që do të merret me futboll. Ky projekt do të na mundësojë dhe do të na lehtësojë shumë për stërvitjet, për të nxjerrë talente të reja. Falënderoj FSHF-në për këtë projekt kaq të madh”, – tha Driton Aliu.

Entuziazmin për fushat e reja e ndajnë edhe futbollistët e rinj, të cilët presin të kenë kushte më të mira për stërvitje dhe zhvillimin e aktiviteteve sportive.

“Për mua, një fushë e re është një ndjenjë shumë e mirë, sepse deri tani nuk kemi pasur shumë kushte. Falënderoj FSHF-në që po na mundëson fushat e reja për të luajtur dhe për të zhvilluar aktivitete të ndryshme, stërvitje dhe për të luajtur më shumë”, – tha Diar Zeqiri.

“Ne jemi shumë të lumtur që po na ndërtojnë fushën e re, sepse nuk kemi pasur shumë kushte për t’u stërvitur, por tani do t’i kemi kushtet për t’u stërvitur. E falënderoj FSHF-në”, – tha Bleron Aliu.

Federata e Futbollit vijon gjithashtu ftesën për bizneset dhe donatorët që dëshirojnë të kontribuojnë në realizimin e kësaj nisme në mbështetje të fëmijëve dhe të rinjve shqiptarë në Luginën e Preshevës.

Armir Grima është kryetari i ri i Shoqatës Rajonale të Futbollit Shkodër. Në Asamblenë e Përgjithshme të Jashtëzakonshme të SHRF Shkodër, Grima u votua nga 20 anëtarët me të drejtë vote, duke marrë drejtimin e shoqatës për të vijuar punën për zhvillimin e futbollit në rajonin e Shkodrës.

Pas mbetjes vakant të pozicionit të kryetarit, pas dorëheqjes së Lazer Matijas, drejtuesit e Shoqatës vendosën thirrjen e Asamblesë së Përgjithshme të Jashtëzakonshme për të vijuar procesin e drejtimit dhe funksionimit të Shoqatës Rajonale të Futbollit Shkodër.

Komisioni i Verifikimit, organi përgjegjës për organizimin dhe administrimin e procesit zgjedhor, bëri të ditur se në këtë proces ishte paraqitur vetëm një kandidaturë, ajo e Armir Grimës, i propozuar nga 20 prej 21 anëtarëve të SHRF Shkodër. Në Asamble morën pjesë 30 delegatë.

Pas zgjedhjes në krye të Shoqatës Rajonale të Futbollit Shkodër, Armir Grima falënderoi anëtarët për besimin e dhënë, duke theksuar rëndësinë e bashkëpunimit dhe angazhimit të përbashkët për zhvillimin e futbollit në të gjithë rajonin.

“Të nderuar anëtarë të Shoqatës Rajonale të Futbollit Shkodër,

Ju falënderoj sinqerisht për besimin që më dhatë sot dhe për mbështetjen tuaj. E vlerësoj këtë përgjegjësi dhe e marr me respektin e duhur ndaj Shoqatës, anëtarëve të saj dhe traditës së futbollit në Shkodër.

Besoj se puna jonë në vijim duhet të mbështetet mbi bashkëpunimin, komunikimin dhe angazhimin e përbashkët të të gjithë anëtarëve. Ka shumë për të bërë dhe synimi im është që, së bashku, të vijojmë të forcojmë aktivitetin e Shoqatës dhe të krijojmë sa më shumë mundësi për zhvillimin e futbollit në të gjithë rajonin.

Dua të falënderoj Komisionin e Verifikimit për punën dhe profesionalizmin e treguar gjatë procesit zgjedhor, si dhe të gjithë ju për besimin e dhënë. Ju siguroj se do të jem i angazhuar për të përfaqësuar interesat e Shoqatës dhe për të punuar në bashkëpunim me të gjithë anëtarët e saj.

Faleminderit edhe një herë për besimin. Ju uroj punë të mbarë dhe suksese për Shoqatën Rajonale të Futbollit Shkodër”, – tha Armir Grima.

Tirana ka mirëpritur MedSportTech International Congress 2026, një kongres ndërkombëtar që bashkon profesionistë të mjekësisë, shkencës së sportit, farmacisë dhe teknologjisë për të diskutuar mbi risitë dhe sfidat e kujdesit shëndetësor dhe performancës sportive. Aktiviteti, që zhvillohet për herë të parë në Shqipëri, përfshin në program tema të rëndësishme si strategjia e UEFA-s për shëndetin e futbollistëve, parandalimi i dëmtimeve, antidopingu, inteligjenca artificiale dhe rehabilitimi sportiv.

Në këtë kongres mori pjesë edhe Sekretari i Përgjithshëm i FSHF, Ilir Shulku, i cili në emër të Presidentit Armand Duka dhe FSHF-së, përgëzoi organizatorët për këtë nismë, duke theksuar rëndësinë e bashkëpunimit dhe shkëmbimit të përvojave për zhvillimin e mjekësisë sportive.

“Është kënaqësi të jem sot mes jush, në një kongres që bashkon mjekësinë, shkencën e sportit dhe teknologjinë, tri fusha që po ndikojnë gjithnjë e më shumë në zhvillimin e sportit modern.
Në emër të Presidenti Armand Duka dhe Federatës Shqiptare të Futbollit, përgëzoj organizatorët për këtë nismë dhe për krijimin e një platforme ndërkombëtare që sjell në Tiranë ekspertizë, përvojë dhe ide të reja për të ardhmen e mjekësisë sportive”, – tha ai.

Shulku vlerësoi rëndësinë e këtij aktiviteti për shkëmbimin e përvojave dhe zhvillimin e mjekësisë sportive, duke theksuar se shëndeti i futbollistëve, parandalimi i dëmtimeve dhe rikthimi i sigurt në fushë janë elemente thelbësore të futbollit modern.

“Për ne, si Federatë Futbolli, kjo temë ka rëndësi të veçantë. Nuk mund të flasim për futboll modern dhe performancë të lartë pa vendosur në qendër shëndetin e sportistit. Parandalimi i dëmtimeve, kujdesi mjekësor, rehabilitimi dhe rikthimi i sigurt në fushë janë pjesë thelbësore e përgatitjes së çdo futbollisti.

Futbolli dhe sporti i sotëm kërkon gjithnjë e më shumë nga sportistët. Intensiteti i ndeshjeve, ngarkesa e stërvitjes dhe kalendari konkurrues e bëjnë të domosdoshme një qasje profesionale, ku ndërhyrja mjekësore nuk fillon vetëm kur ndodh dëmtimi, por shumë më herët, përmes parandalimit, monitorimit dhe vlerësimit të vazhdueshëm”, – tha Shulku.

Gjatë fjalës së tij, Sekretari i Përgjithshëm u ndal te investimet e FSHF-së në këtë drejtim, veçanërisht te klinika e Kombëtares, një qendër ekselence e pajisur me teknologji të avancuar për fizioterapinë dhe rehabilitimin. Ai theksoi se synimi i Federatës është që standardet bashkëkohore të kujdesit mjekësor të mos shërbejnë vetëm për ekipet kombëtare, por të përbëjnë një pikë referimi edhe për klubet dhe akademitë e futbollit shqiptar.

“Pikërisht në këtë drejtim, Federata Shqiptare e Futbollit ka ndërmarrë investime konkrete. Një prej tyre është klinika e Kombëtares, një qendër ekselence për mjekësinë sportive, e pajisur me teknologji të avancuar në fushën e fizioterapisë dhe rehabilitimit.

Krijimi i kësaj qendre është pjesë e angazhimit tonë për të ngritur standardet e kujdesit ndaj futbollistëve dhe për t’u krijuar atyre kushte sa më të mira për vlerësim, trajtim dhe rikuperim.
Për ne, ky investim nuk ka të bëjë vetëm me pajisjet apo infrastrukturën. Ka të bëjë me cilësinë e shërbimit dhe me krijimin e një mjedisi ku profesionistët mund të punojnë sipas standardeve bashkëkohore të mjekësisë sportive.

Ambicia jonë është që zhvillimi i këtyre standardeve të mos kufizohet vetëm te ekipet kombëtare, por të shërbejë si pikë referimi edhe për klubet dhe akademitë e futbollit shqiptar.

Temat e këtij kongresi, nga strategjitë për shëndetin e futbollistëve te inteligjenca artificiale, biosensorët dhe rehabilitimi i personalizuar, tregojnë se sa shpejt po zhvillohet kjo fushë.
Sfida jonë është që këto risi të mos mbeten vetëm në nivelin e kërkimit shkencor, por të gjejnë zbatim konkret në praktikën e përditshme.

Për këtë arsye, bashkëpunimi ndërmjet federatave sportive, institucioneve shëndetësore, universiteteve dhe komunitetit shkencor është i domosdoshëm.

Besoj se MedSportTech International Congress është një mundësi e mirë për të forcuar këtë bashkëpunim dhe për të krijuar ura të reja mes shkencës dhe praktikës sportive.

Në përfundim, dëshiroj të ritheksoj se për Federatën Shqiptare të Futbollit, investimi në mjekësinë sportive është investim në të ardhmen e futbollit. Është investim në shëndetin e lojtarëve, në zhvillimin e tyre profesional dhe në krijimin e kushteve për karriera më të sigurta e më të gjata”, – përfundoi Ilir Shulku.

Kategoria e Parë vijon sot dhe nesër me ndeshjet e javës së 6-të të kampionatit, me gjashtë përballje të programuara në dy ditë. Të gjitha ndeshjet do të luhen në orën 13:30, ndërsa skuadrat do të zbresin në fushë për të vijuar garën në këtë fazë të sezonit.

Java e 6-të nis këtë të premte, me dy ndeshje. Kukësi pret Besën, ndërsa Oriku përballet me Flamurtarin.

Katër ndeshjet e tjera do të zhvillohen të shtunën, më 17 tetor. Iliria pret Burrelin, ndërsa Korabi luan në shtëpi ndaj Bylisit. Në dy takimet e tjera, Besëlidhja përballet me Kastriotin, ndërsa Pogradeci pret Sopotit.

Me gjashtë ndeshjet e kësaj jave, kampionati i Kategorisë së Parë vijon rrugëtimin e tij, me skuadrat që kërkojnë të konsolidojnë rezultatet dhe të përmirësojnë pozitat në renditje

Kategoria e Parë, java e 6-të
Kukësi – Besa, 16.10.2026, 13:30
Oriku – Flamurtari, 16.10.2026, 13:30
Iliria – Burreli, 17.10.2026, 13:30
Korabi – Bylis, 17.10.2026, 13:30
Besëlidhja – Kastrioti, 17.10.2026, 13:30
Pogradeci – Sopoti, 17.10.2026, 13:30

Egnatia e ka nisur me një barazim aventurën historike në fazën e ligës të UEFA Conference League. Kampionët e Shqipërisë barazuan 1-1 me skuadrën daneze të Midtjylland, në ndeshjen e zhvilluar në stadiumin “Elbasan Arena”.

Skuadra rrogozhinase kaloi e para në avantazh në minutën e 26-të me anë të Ildi Grudës, duke ndezur festën në stadium. Megjithatë, miqtë reaguan shpejt dhe arritën të barazonin shifrat në minutën e 33-të me Cho Gue-Sung.

Pavarësisht përpjekjeve të të dyja skuadrave, rezultati mbeti i pandryshuar deri në përfundim të takimit, me Egnatian që siguron pikën e parë në këtë fazë të kompeticionit europian.

Ndeshjen e radhës në UEFA Conference League, Egnatia do ta luajë në transfertë ndaj Aarhus, më 22 tetor, në orën 21:00.